James 5

óísankwara-kwaasiti kwaasái.

1óísankwara-kwaasiyono. senda-áímbá ísáaro. kentópaꞋo umbai-yántááꞋó tínímba anón-imayaa kwéeꞋa kanagíꞋá kwéteꞋa ménaaowe. 2sáwívar-oisamba makáan-oisamba atúnkaisana sáwívar-unankwatoi kwaígo ánáamba káráyuwaisana 3óntamba makáamba atúnkaisasa kwaási awánésa sésa íma túwaꞋnaa ombá makáawana atúnkaiye sénááomba iramó aneꞋó kwégainten-umai sáwí-meyamba kentópaꞋa tíníye. sáwívar-oisamba makáambanivo Áánútu kwaásimo máyáawaina ááimba tísaa ínín-kanaama tíníye. 4kentí kígau on-kwáásítí meéyámbá íma kaweꞋá umái timéꞋa sáwíꞋa kwéomba Áánútu awánaraiye. minkwáásí anónkar-anonkaꞋa kwésewana Áánútu asirayánkwáráwáí kwéisaiye. 5marapáꞋó máyáankaꞋa sáwívar-oisamba maréꞋa kentí imáyáavinkemba kembó tínkáim-bayai kwémayaawe. ímo sáwíꞋo uráan-kwaasi aaivimbá maitínkówaꞋa íma anondá aaí suwaꞋá tínkamuwasa pukáawe. póímo toómbó kwétimewanamo anón-isasamó tuvúꞋnaantemba kembó tínkáisaꞋo mirámó kwéomba Áánútu sáwí-meyamba timíníye.

asiramái mésa námúnaa kwésen-kwasai.

7mindáyaveꞋa asiramái maimaé kwéiyeꞋa Ísóigo ókwaraꞋo kumínímba amuꞋmáráaro. kígaugo avowámá kígau úmakena amuꞋmaréna séna kaekáꞋá aaꞋá téna kígau anón-ínaꞋa nánáe séna amuꞋmaráíntemba 8miráráán-umai Ísóigomba amuꞋmakéwana kumíníye. Ísóigo sáwíyankaꞋa kumínímba póꞋa asiramái aánoumai máéro. 9Áánútu aaivimbá maitinkánívo kentí kwaási íma íꞋái tínkáaro. Áánútu aaivimbá maitinkánín-kanaa sáwíyankaꞋa tíníye.

10kesí kwaásiyono. naaóváꞋá Áánútun-aai simátímakowaimo uráamba imáyáa oro. Ísóigo simátímakon-aimba simátímaꞋmae iyúwasa íma ísówana umbai-yántááꞋá sáwívaꞋa miwítópaꞋa túwasa Áánútun-aai íma ivátuwesa asiramáímo mésamo uráantemba miráumai máéro. 11naaóváꞋá Áánútuna imáyáa ésa asiramái máyón-kwaasiyaveta séta Áánútu kaweꞋá umátínkarain-kwaasiman-owe kwésune. naaóváꞋá moórá-kwaasi áwíꞋa Yópoma uráin-aimba imáyáa oro. umbai-yántááꞋá sáwívaꞋa kwenópaꞋa túwana Ísóigontavena asiramái maíꞋmaiꞋa úmae kwéiyuwana naaémba Ísóigo kawe-tántááꞋá ámakaiye. miráumai Ísóigo anón-arumba umásinkena kwésuwaꞋnaa-iye.

12kesí kwaásiyono. anón-aimba ísáaro. kentááiyavesa áraire sénááontavesa íma tikáꞋá kwémareꞋa árair-aimba súne sembá kwíyómpaꞋa máyáiwai aúrankaꞋa áraiꞋa kwésune íma séꞋa marapá-kwáásí túrankaꞋa áraiꞋa kwésune íma seró. ánivo owémó séꞋo éꞋa úwoi owé séꞋa íma tikáꞋá kwémareꞋa seró. aꞋáomo séꞋo éꞋa úwoi aꞋáo séꞋa íma tikáꞋá kwémareꞋa seró. mirámó síyanamo éna Áánútu mináíntávéna íma sáwí-meyamba timíníye.

13keinárawapinkembo umbai-yántááꞋó mayáíyawai ÁánútunkaꞋa námúnaa seró. keinárawapinkembo tirunkó aamoí íyawai monor-ímá kwésesa Áánútu áwíꞋa mósá máráaro. 14keinárawapinkembo tíꞋo índawai Ísóigona kwaásiti anón-kwaasi tááyaiyasa tésa Ísóigona asirayámbá imáyáa ésa masawémba túraꞋa pétinkesa námúnaa seró. 15Áánútumo siráintemba íníye kwésesa námúnaa kwésemba póna Áánútu minkwáásí kaweꞋá umátinkena usásintinkena minkwáásímó sáwíꞋo uráiyanamo éna miwívínkémbá maitiyuwáníye. 16mindáyaveꞋa kentí kwaási sáwíꞋo kwéomba avoraꞋá simátimeꞋa námúnaa simái túwaꞋnaa oro. mirámó íyanamo éna tíꞋo índamo éna Áánútu asóvamatinkaniye. arupí umái máyáawaimo námúnaa kwésemba Áánútu iséna asiramái kwétuwaꞋnaa-iye.

17naaóváꞋá Áánútun-aai simátímakowai áwíꞋa Íráiyaa ména kwemá kesáámó úndanten-kwaasi ména ÁánútunkaꞋa asiramái námúnaavinkemba séna aaꞋá íma tíno súwana íma aaꞋá téna kaumbo-ímá umái avaꞋmoraé-kwiyomba maisuwówana íma aaꞋá túwana 18minkákémbá naaémba námúnaavinkemba aaꞋá tíno súwana aaꞋá túwana kígauvaꞋa amápa-tomba kaweꞋá uráiye. miráumai arupí umái máyáawaimo námúnaa kwésemba Áánútu iséna asiramái kwétuwaꞋnaa-iye.

19kesí kwaásiyono. keinárawapinkembo évakarawaimo kawer-ámpáꞋó tuwáíyaꞋo éꞋa méyavisiyasamo tésamo kawer-ámpáꞋó tíyaꞋo éꞋa kaweꞋá umátinkanaaowe. sáwíꞋo uráiyawaimo méyavisiyasamo sáwí-ampaꞋo tuwésamo ÁánútumpaꞋo tíyanamo éna Áánútu misáwí-yántááꞋá sáwívaꞋa maitiyuwáínasa Áánútuna némpaꞋo iramó kwégaindavaꞋa íma kónááowe. mináímbá imáyáa oró.

kemá Yémésimo súnda-aimba ánásaiye.

20